മതംപറഞ്ഞ് വോട്ട് പിടിച്ച് നിലമ്പൂരിലെ എല്‍.ഡി.ഫ് എം.എല്‍.എ പി.വി.അന്‍വര്‍. ശബ്ദരേഖ പുറത്ത്.
”റബ്ബിനെ സാക്ഷി നിര്‍ത്തി ഞാന്‍ പറയുന്നു. ഇഹലോകവും പരലോകവുമില്ലാത്തവര്‍ക്ക് വോട്ടു ചെയ്ത് വിട്ടിട്ട് എന്ത് കാര്യം” എന്ന് ചോദിച്ച് പച്ചക്ക് വര്‍ഗീയത പറഞ്ഞാണ് അന്‍വറിന്റെ പ്രസംഗം. നിലമ്പൂര്‍ നഗരസഭയിലെ വൃന്ദാവനംകുന്നിലെ യോഗത്തിലാണ് മതവും വര്‍ഗീയതയും പറഞ്ഞ് അന്‍വര്‍ വോട്ടു ചോദിക്കുന്ന പ്രസംഗത്തിന്റെ ഓഡിയോ പുറത്തുവന്നത്. നഗരസഭയിലെ ചന്തക്കുന്ന് ഡിവിഷനിലെലെ ഇടതുപക്ഷ സ്വതന്ത്ര സ്ഥാനാര്‍ത്ഥി അബിദക്ക് വേട്ടുതേടിയായിരുന്നു എം.എല്‍.എയുടെ വിവാദ പ്രസംഗം.
”ഇന്‍ശ അള്ള, ഈ മഗ്രിബിന്റെ സമയത്ത് റബ്ബിനെ സാക്ഷി നിര്‍ത്തി ഞാന്‍ നിങ്ങളോട് പറയുന്നു. ഇത് രാഷ്ട്രീയമൊന്നുമല്ല. എനിക്ക് വോട്ടു ചെയ്ത ഈ മനുഷ്യന്‍മാരെ സഹായിക്കല്‍ എന്റെ അനാമത്താണ്. ഈ ചെയ്യുന്ന പ്രവൃത്തിയൊക്കെ ഇബാദത്താണ്. ഇഹലോകവും പരലോകവുമില്ലാത്തവര്‍ക്ക് വേട്ടു ചെയ്ത് വിട്ടിട്ട് എന്താണ് കാര്യം. ബാക്കിയൊന്നും ഞാന്‍ പറയേണ്ട കാര്യമില്ലല്ലോ. മനസിലാക്കാനുള്ള ശേഷി നിങ്ങള്‍ക്കുണ്ടാകും. പടച്ചോനെ പേടിയുള്ളവനേ പടപ്പിനെയും പേടിക്കൂ. പടച്ചോനെ പേടിക്കാത്തവര്‍ക്ക് എന്തിന് പടപ്പിനെ പേടിക്കണം. അതു മനസിലാക്കി കൊള്ളീ. ” ആബിദയെ നിങ്ങള്‍ തോല്‍പ്പിച്ചാലും മുനിസിപ്പാലിറ്റി പടച്ചോന്‍ തന്നാല്‍ കുടിവെള്ളം തരുമെന്നും പ്രസംഗത്തില്‍ അന്‍വര്‍ പറയുന്നുണ്ട്.
ഏഴു മിനിറ്റും ഏഴു സെക്കന്റും ദൈര്‍ഘ്യമുള്ളതാണ് അന്‍വറിന്റെ പ്രസംഗം. മുസ്ലീം ഭൂരിപക്ഷ പ്രദേശമായ വൃന്ദാവന്‍കുന്ന് ഉള്‍ക്കൊള്ളുന്ന ചന്തക്കുന്ന് 9-ാംഡിവിഷനില്‍ ആബിദ താത്തൂക്കാരന്‍ ഇടതു പക്ഷ സ്വതന്ത്ര സ്ഥാനാര്‍ത്ഥിയും കോണ്‍ഗ്രസ് സ്ഥാനാര്‍ത്ഥി ശ്രീജ വെട്ടത്തേഴത്തുമാണ്.
നേരത്തെ നിലമ്പൂരിലെ കുടുംബയോഗത്തില്‍ ”ഡല്‍ഹിയില്‍ നിന്നും കുറെ ഹമുക്കുകളെ വിട്ടിട്ടുണ്ട്. മുഖ്യമന്ത്രിയെ ചോദ്യം ചെയ്യാന്‍ ഈ ഏജന്‍സികള്‍ കടന്നുവരുമെന്നും അന്‍വര്‍ പ്രസംഗിച്ചിരുന്നു.” കഴിഞ്ഞ ലോക്സഭാ തെരഞ്ഞെടുപ്പില്‍ പൊന്നാനിയില്‍ ഇടതുപക്ഷ സ്ഥാനാര്‍ത്ഥിയായി മത്സരിക്കവേ രാഹുല്‍ഗാന്ധിയുടെ കരങ്ങള്‍ക്ക് കരുത്ത്പകരാന്‍ തന്നെ വിജയിപ്പിക്കണമന്ന് അന്‍വര്‍ പ്രസംഗിച്ചതും വിവാദമായിരുന്നു. പൊന്നാനിയില്‍ പരാജയപ്പെട്ടാല്‍ എം.എല്‍.എ സ്ഥാനം രാജിവെക്കുമെന്നും രാഷ്ട്രീയ പ്രവര്‍ത്തനം അവസാനിപ്പിക്കുമെന്നും പ്രഖ്യാപനവുമുണ്ടായിരുന്നു. പൊന്നാനിയില്‍ ഇ.ടി മുഹമ്മദ്ബഷീറിനോട് 1,93,273 വോട്ടുകള്‍ക്ക് പരാജയപ്പെട്ടപ്പോള്‍ പ്രഖ്യാപനത്തെ തള്ളിപ്പറയുകയായിരുന്നു അന്‍വര്‍. മലപ്പുറത്ത് ലീഗ് മതംപറഞ്ഞ് വോട്ടുപിടക്കുന്നുവെന്ന് വിമര്‍ശിക്കുന്ന സി.പി.എം നേതൃത്വത്തിന് സ്വന്തം എം.എല്‍.എയുടെ വര്‍ഗീയ പ്രസംഗം തിരിച്ചടിയാവുകയാണ്. .
