പാര്‍ട്ടി മാറുന്നതിനെ കുറിച്ച് ഞാന്‍ ചിന്തിച്ചിട്ടേയില്ലെന്ന് ഫാത്തിമ തെഹ്ലിയ

Breaking News Politics

കോഴിക്കോട്: മുസ്ലിം ലീഗിന്റെ ആദര്‍ശത്തില്‍ വിശ്വസിച്ചാണ് ഞാന്‍ പാര്‍ട്ടിയില്‍ ചേര്‍ന്നതെന്ന് എംഎസ്എഫ് ദേശീയ വൈസ് പ്രസിഡണ്ട് പദവിയില്‍ നിന്നും ഒഴിവാക്കിയ ഫാത്തിമ തെഹ്ലിയ.
സ്ഥാനമാനങ്ങള്‍ക്കോ അധികാരത്തിനോ വേണ്ടിയല്ല താന്‍ ഈ പാര്‍ട്ടിയില്‍ വന്നതെന്നും ഇപ്പോള്‍ നിലനില്‍ക്കുന്ന വിഷയങ്ങളുമായി ബന്ധപ്പെട്ട് പാര്‍ട്ടി മാറുന്നതിനെ കുറിച്ച് ഞാന്‍ ചിന്തിച്ചിട്ടേയില്ലെന്നും ഫാത്തിമ തെഹ്ലിയ പറഞ്ഞു. മറിച്ചുള്ള വാര്‍ത്തകള്‍ കളവും ദുരുദ്ദേശപരവുമാണെന്നും ഫാത്തിമ ഫേസ്ബുക്കില്‍ കുറിച്ചു. എംഎസ്എഫ് ദേശീയ വൈസ് പ്രസിഡണ്ട് പദവിയില്‍ നിന്നും ഒഴിവാക്കിയ ഫാത്തിമ തെഹ്ലിയയെ സിപിഐഎമ്മില്‍ കൊണ്ടുവരാനുള്ള ശ്രമം നടക്കുന്നതായി വാര്‍ത്തകള്‍ പുറത്തുവന്നതിന് പിന്നാലെയാണ് ഫാത്തിമ തഹ്ലിയ തന്റെ നിലപാട് വ്യക്തമാക്കിയത്. കോഴിക്കോട് നിന്നുള്ള മുന്‍ സിപിഐഎം എംഎല്‍എയും തിരുവനന്തപുരത്തു നിന്നുള്ള ചില ഡിവൈഎഫ്ഐ നേതാക്കളും ഈ കാര്യത്തില്‍ ചര്‍ച്ച നടത്തുന്നുണ്ടെന്ന സൂചനകളാണ് പുറത്തുവന്നിരുന്നത്.

കാനത്തില്‍ ജമീല ജയിച്ച സാഹചര്യത്തില്‍ വരാനിരിക്കുന്ന കോഴിക്കോട് ജില്ലാ പഞ്ചായത്ത് ഉപതെരഞ്ഞെടുപ്പില്‍ നന്മണ്ട മണ്ഡലത്തില്‍ നിന്നും തെഹ്ലിയായെ മത്സരിപ്പിക്കാമെന്നാണ് സിപിഐഎമ്മിന്റെ ലക്ഷ്യം. മുസ്ലിം ലീഗ് സംസ്ഥാന കമ്മിറ്റിയുടെ നിര്‍ദേശപ്രകാരം ദേശീയ പ്രസിഡന്റ് ഖാദര്‍ മൊയ്തീനാണ് വൈസ് പ്രസിഡന്റ് പദവിയില്‍ നിന്നും തെഹ്ലിയയെ ഒഴിവാക്കിയതായി അറിയിച്ചത്. ഹരിത നേതാക്കള്‍ നല്‍കിയ പരാതിക്ക് തെഹ്ലിയ പിന്തുണ നല്‍കുകയും, പുതിയ ഹരിത കമ്മിറ്റി രൂപീകരിച്ചപ്പോള്‍ കൂടി ആലോചിക്കാതെ എടുത്ത തീരുമാനമാണെന്ന് പരസ്യമായി പ്രതികരിക്കുകയും ചെയ്തിരുന്നു. ഈ നിലപാടുകളാണ് തെഹ്ലിയയെ പദവിയില്‍ നിന്നും ഒഴിവാക്കാനുള്ള പ്രധാന കാരണങ്ങള്‍ എന്നാണ് സൂചന.