ശോഭാസുരേന്ദ്രന് ബി.ജെ.പി.യില്‍ ഉയര്‍ന്ന പോസ്റ്റിന് സാധ്യത

Breaking Keralam News

പാലക്കാട്: ശോഭാസുരേന്ദ്രന് ബി.ജെ.പി.യില്‍ ഉയര്‍ന്ന പോസ്റ്റിന് സാധ്യത. വി.മുരളീധരന്റെ
മന്ത്രിസ്ഥാനം തുളാസില്‍. തദ്ദേശ തെരഞ്ഞെടുപ്പിന് മുന്നോടിയായി ബിജെപി സംസ്ഥാന ഘടകത്തിലെ ഭിന്നതകള്‍ പരിഹരിക്കാനുള്ള കേന്ദ്ര നേതൃത്വത്തിന്റെ ശ്രമവും ഫലം കാണാതെ നീളുന്നു. സംസ്ഥാന ബിജെപിയിലെ പ്രശ്നങ്ങളില്‍ ആര്‍എസ്എസിലെ മുതിര്‍ന്ന നേതാക്കളും ഇരുപക്ഷത്തായി നിലയുറപ്പിച്ചതാണ് ദേശീയ നേതൃത്വത്തെ കുഴക്കുന്നത്. വി മുരളീധരനെ കേന്ദ്രമന്ത്രി സ്ഥാനത്തുനിന്ന് നീക്കണമെന്നാണ് ശോഭാ സുരേന്ദ്രന്റെ നേതൃത്വത്തിലുള്ള വിമത പക്ഷത്തിന്റെ പുതിയ ആവശ്യം. ഇക്കാര്യത്തില്‍ പൊടുന്നനെ തീരുമാനമെടുക്കാനാവില്ലെന്നും ചര്‍ച്ചകള്‍ നടക്കട്ടെയെന്നുമാണ് കേരളത്തിന്റെ ചുമതലയുള്ള പ്രഭാരി സി പി രാധാകൃഷ്ണന്‍ അറിയിച്ചത്. ബി.ജെ പി നദ്ദയുമായും അമിത് ഷായുമായും വളരെ അടുപ്പമുള്ള വി മുരളീധരനെ മാറ്റുക എളുപ്പമാവില്ല. അതേസമയം വി മുരളീധരന് ആന്ധ്രയിലെ സംഘടനാ ചാര്‍ജ് നല്‍കിയത് കേന്ദ്ര മന്ത്രി സ്ഥാനത്തുനിന്ന് മാറ്റി നിര്‍ത്തുന്നതിനു വേണ്ടിയാണെന്ന സംശയവും നേതാക്കള്‍ക്കിടയിലുണ്ട്. കേന്ദ്ര മന്ത്രിമാര്‍ക്ക് ബിജെപി ഇത്തരത്തില്‍ സംഘടനാ ചാര്‍ജ് നല്‍കാറില്ലെന്നതാണ് കാരണം. അത്തരം നടപടികളിലേക്ക് പോയാല്‍ കേരളത്തില്‍ ബിജെപി പിളര്‍പ്പിലേക്ക് പോകുമെന്നാണ് ആര്‍എസ്എസ് നേതാക്കള്‍ ദേശീയ നേതൃത്വത്തെ അറിയിച്ചിട്ടുള്ളത്.
തദ്ദേശ തെരഞ്ഞെടുപ്പിന് മുന്നോടിയായി പ്രശ്നങ്ങള്‍ പരിഹരിക്കുന്നതിന് വെള്ളിയാഴ്ച കൊച്ചിയില്‍ ചേര്‍ന്ന കോര്‍ കമ്മിറ്റി യോഗവും ശോഭാ സുരേന്ദ്രന്‍ ബഹിഷ്‌കരിച്ചിരുന്നു. രമ്യമായി പരിഹരിക്കാമെന്ന് ബിജെപി ദേശീയ എക്സിക്യൂട്ടിവ് അംഗം കൂടിയായ സി പി രാധാകൃഷ്ണന്‍ ഫോണില്‍ ഉറപ്പു നല്‍കിയിട്ടും ശോഭാ സുരേന്ദ്രന്‍ വഴങ്ങിയില്ല. യോഗത്തിന് ശേഷം സി പി രാധാകൃഷ്ണന്‍ മാധ്യമങ്ങളോട് സംസാരിക്കാതെയാണ് മടങ്ങിയത്. സംസ്ഥാനത്തിന്റെ ചുമതല ഏറ്റെടുത്ത ശേഷം രാധാകൃഷ്ണന്റെ ആദ്യ യോഗമായിരുന്നു കൊച്ചിയില്‍ നടന്നത്.

ദേശീയ തലത്തില്‍ തന്നെ പരിഹാരം കാണണമെന്നാണ് ശോഭാ സുരേന്ദ്രന്റെ ആവശ്യം. അതേസമയം ശോഭാ സുരേന്ദ്രന്‍ വിഷയം ചര്‍ച്ചകളുടെ അജണ്ടയിലില്ലെന്നും തദ്ദേശ തെരഞ്ഞെടുപ്പാണ് ഇപ്പോള്‍ ചര്‍ച്ചകളെന്നുമുള്ള കെ സുരേന്ദ്രന്റെ പ്രസ്താവനയും ഇരുവിഭാഗവും തമ്മിലുള്ള അകല്‍ച്ചയാണ് വ്യക്തമാക്കുന്നത്. ദീപാവലിയും ബീഹാര്‍ തെരഞ്ഞെടുപ്പും കഴിഞ്ഞതിന് ശേഷം പ്രശ്നം പരിഹരിയ്ക്കാമെന്നാണ് കേന്ദ്ര നേതാക്കള്‍ ഉറപ്പു നല്‍കിയിരുന്നത്. ഇതനുസരിച്ചാണ് സി പി രാധാകൃഷ്ണന്‍ ചര്‍ച്ചയ്ക്കെത്തിയതും. കേന്ദ്രത്തിന്റെ നിര്‍ദേശങ്ങളുണ്ടായിരുന്നിട്ടും ശോഭാ സുരേന്ദ്രന്‍ ഇടഞ്ഞുനില്‍ക്കുന്നത് രാധാകൃഷ്ണന്‍ നേതൃത്വത്തിന്റെ ശ്രദ്ധയില്‍പ്പെടുത്തും.

തദ്ദേശ തെരഞ്ഞെടുപ്പും തൊട്ടുപിന്നാലെ നിയമസഭാ തെരഞ്ഞെടുപ്പും വരുന്നതിനാല്‍ കടുത്ത അച്ചടക്ക നടപടികളിലേക്ക് കേന്ദ്ര നേതൃത്വവും കടക്കുകയില്ല. ആര്‍എസ്എസിന്റെ പിന്തുണയുണ്ടെന്ന് അവകാശപ്പെടുന്ന കൃഷ്ണദാസ് പക്ഷം നിയമസഭാ തെരഞ്ഞെടുപ്പിന് മുന്‍പ് പ്രശ്നം പരിഹരിക്കുമെന്നാണ് പറയുന്നത്. എന്നാല്‍ സംസ്ഥാനത്തെ വിഭാഗീയതയില്‍ ആര്‍എസ്എസ് നേതാക്കളും രണ്ടു ചേരിയിലാണ്. മുതിര്‍ന്ന നേതാവ് ജെ നന്ദകുമാര്‍ വി മുരളീധരനെയും കെ സുരേന്ദ്രനെയുമാണ് പിന്തുണക്കുന്നത്. എസ് സുദര്‍ശന്‍, ഗോപാലന്‍ കുട്ടി മാസ്റ്റര്‍, ഹരി കൃഷ്ണന്‍, പി ആര്‍ ശശിധരന്‍ എന്നിവര്‍ ശോഭാ സുരേന്ദ്രനൊപ്പവുമാണ്. മുതിര്‍ന്ന നേതാക്കള്‍ക്ക് പരിഗണന നല്‍കണമെന്നാവശ്യപ്പെട്ട് ഇവര്‍ കേന്ദ്ര നേതൃത്വത്തില്‍ സമ്മര്‍ദം ചെലുത്തുന്നുണ്ട്.
കേന്ദ്രനേതൃത്വത്തെ കൂടി സമ്മര്‍ദ്ദത്തിലാക്കി പ്രശ്ന പരിഹാരമുണ്ടാക്കാനാണ് വി മുരളീധരനെ കേന്ദ്ര മന്ത്രി സ്ഥാനത്തുനിന്ന് നീക്കണമെന്ന ആവശ്യം മുന്നോട്ടുവെയ്ക്കുന്നത്. ദേശീയതലത്തില്‍ അര്‍ഹമായ പരിഗണന ലഭിച്ചാല്‍ സംഘടനാ പ്രവര്‍ത്തനങ്ങളില്‍ സജീവമാകാമെന്ന് ശോഭാ സുരേന്ദ്രനുള്‍പ്പെടെയുള്ള നേതാക്കള്‍ സി പി രാധാകൃഷ്ണനെ അറിയിച്ചിട്ടുണ്ട്. കൊച്ചിയിലെ യോഗത്തില്‍ ശോഭാ സുരേന്ദ്രനു പുറമെ സി കെ പത്മനാഭനും പങ്കെടുത്തിരുന്നില്ല. മുന്‍ പ്രസിഡന്റുമാരും ജനറല്‍ സെക്രട്ടറിമാരും കൂടിയാലോചിച്ച് സംഘടനാ തീരുമാനങ്ങള്‍ എടുക്കുന്ന പതിവുരീതി സംസ്ഥാന പ്രസിഡന്റ് കെ സുരേന്ദ്രന്‍ ലംഘിച്ചെന്നും ഏക പക്ഷീയമായ തീരുമാനങ്ങളാണ് സുരേന്ദ്രന്റേതെന്നുമാണ് വിമതരുടെ ആരോപണം. കുമ്മനം രാജശേഖരന്‍, സി കെ പത്മനാഭന്‍ എന്നിവരോടുള്ള അവഗണന തുടരുന്നതിനാലാണ് യോഗത്തില്‍ പങ്കെടുക്കാതിരുന്നതെന്നാണ് ശോഭാ സുരേന്ദ്രന്‍ പറയുന്നത്.
ആര്‍എസ്എസ് കൂടി ഇക്കാര്യങ്ങളില്‍ ഗ്രൂപ്പ് തിരഞ്ഞതോടെ ബിജെപി ദേശീയ നേതൃത്വത്തിന് മാത്രമേ വിഭാഗീയത പരിഹരിക്കാനാവുകയുള്ളൂവെന്നാണ് കരുതുന്നത്. വിഭാഗീയതയും ഭിന്നിപ്പും തുടര്‍ന്നാല്‍ നിയമസഭാ തെരഞ്ഞെടുപ്പിലെ ബിജെപിയുടെ പ്രതീക്ഷകള്‍ അസ്ഥാനത്താവും. പാലക്കാട് ജില്ലയില്‍ പാലക്കാട്, മലമ്പുഴ നിയമസഭാ മണ്ഡലങ്ങളില്‍ ബിജെപി രണ്ടാം സ്ഥാനത്തെത്തിയിരുന്നു. പാലക്കാട് മത്സരിച്ച ശോഭാ സുരേന്ദ്രനായിരുന്നു ജില്ലയിലെ മുന്നേറ്റത്തിന് ചുക്കാന്‍ പിടിച്ചിരുന്നത്.
ശോഭാ സുരേന്ദ്രനെ അവഗണിയ്ക്കുന്നതില്‍ പ്രതിഷേധിച്ച് പാലക്കാട് നിരവധി പേര്‍ പാര്‍ട്ടി വിട്ടത് ശോഭയുടെ സ്വാധീനം കേന്ദ്ര നേതൃത്വത്തിനും അവഗണിയ്ക്കാനാവില്ലെന്നതിന്റെ സൂചനയാണ്. കെ സുരേന്ദ്രന്‍ അധ്യക്ഷനായതിന് ശേഷം മേഖലാ യോഗങ്ങളില്‍ നിന്നുപോലും ശോഭാ സുരേന്ദ്രനും എ എന്‍ രാധാകൃഷ്ണനും വിട്ടുനിന്നത് ശ്രദ്ധിക്കപ്പെട്ടിരുന്നു. ഇതിനിടെ തൃശൂരില്‍ ശോഭാ സുരേന്ദ്രന്റെ ഗ്രൂപ്പുയോഗം നടന്നതോടെയാണ് പരസ്യ ഏറ്റുമുട്ടലിലേക്ക് ഇരുവിഭാഗവും പോയത്.

Leave a Reply

Your email address will not be published. Required fields are marked *