തിരുവനന്തപുരം മേയര്‍ക്കു വേണ്ടി സി.പി.എം പണിയുന്ന 8 കോടിയുടെ വീട്; യാഥാര്‍ത്ഥ്യം എന്ത്?

News Politics

തിരുവനന്തപുരം: മുടവന്‍മുകള്‍ കേശവദേവ് റോഡിലാണ് തിരുവനന്തപുരം മേയര്‍ ആര്യാ രാജേന്ദ്രന്റെ വാടക വീട്.ഒറ്റ നിലയുള്ള വീട്ടിലേക്ക് ഇരുചക്ര വാഹനം കഷ്ടിച്ച് കടന്നു പോവാകുന്ന ഒരു റോഡാണുള്ളത്. ഇവിടെ നിന്നാണ് 21കാരി ആര്യാ രാജേന്ദ്രന്‍ തിരുവനന്തപുരത്തിന്റെ മേയര്‍ സ്ഥാനത്തേക്കെത്തുന്നത്. പ്രാരാബ്ധങ്ങളും സാമ്പത്തിക പരാധീനതകളും അറിഞ്ഞ് വളര്‍ന്ന ആര്യ തന്റെ വാടക വീട്ടില്‍ തന്നെ താമസം തുടരാനാണ് തീരുമാനിച്ചിരിക്കുന്നത്. എന്നാല്‍ മേയറെ കാണാന്‍ വീട്ടില്‍ എത്തുന്നവര്‍ക്കെല്ലാം വാഹനം കടന്നു ചെല്ലാന്‍ പറ്റാത്തത് വലിയ ബുദ്ധിമുട്ടാണ് ഉണ്ടാക്കുന്നത്. ഇക്കാര്യം സ്ഥലത്തെ നേതാക്കള്‍ പാര്‍ട്ടിയെ അറിയിച്ചതോടെ വിഷയം സിപിഎം നേതൃത്വം ഗൗരവത്തില്‍ എടുത്തു.

ഇതോടെ മേയര്‍ക്ക് ഔദ്യോഗിക വസതി വേണമെന്ന പഴയ ആവശ്യം പാര്‍ട്ടിയില്‍ വീണ്ടും ചര്‍ച്ചയായി. വി ശിവന്‍കുട്ടി മേയറായിരുന്നപ്പോഴാണ് കുന്നുകുഴി വാര്‍ഡില്‍ ബാര്‍ട്ടണ്‍ഹില്ലില്‍ എട്ടരകോടി രൂപ ചെലവില്‍ മേയര്‍ക്ക് ഔദ്യോഗിക വസതി നിര്‍മ്മിക്കാന്‍ ആലോചന തുടങ്ങിയത്. കഴിഞ്ഞ കൗണ്‍സിലില്‍ മേയറായിരുന്ന വി.കെ.പ്രശാന്ത് ഇതിന്റെ തുടര്‍ നടപടികള്‍ വേഗത്തിലാക്കി. തലസ്ഥാനത്ത് എത്തുന്ന മറ്റു മേയര്‍മാര്‍ക്കും താമസിക്കാന്‍ സൗകര്യമുളള മന്ദിരമായതിനാല്‍ നിര്‍മ്മാണച്ചെലവ് തുല്യമായി പങ്കിടാനും കോര്‍പറേഷനുകളുമായി ധാരണയിലെത്തിയിരുന്നുവെന്നാണ് വിവരം.

മൂന്നുനില കെട്ടിടം പണിയാന്‍ ബാര്‍ട്ടണ്‍ഹില്ലിലെ അങ്കണവാടി ഇരിക്കുന്ന സ്ഥലമാണ് കണ്ടെത്തിയത്. അങ്കണവാടി സമീപത്തെ കമ്മ്യൂണിറ്റി ഹാളിലേക്ക് മാറ്റാനും തീരുമാനിച്ചിരുന്നു. ഏറ്റവും താഴെ മേയറുടെ ഓഫീസും ഓഡിറ്റോറിയവും. രണ്ടാം നിലയില്‍ മറ്റു കോര്‍പറേഷനുകളിലെ മേയര്‍മാര്‍ വരുമ്പോള്‍ താമസിക്കാനുളള സൗകര്യം. മൂന്നാം നിലയിലാണ് തലസ്ഥാന മേയറുടെ വസതി. ഇതിന്റെ രൂപകല്‍പ്പനയെല്ലാം പൂര്‍ത്തിയായപ്പോള്‍ പ്രദേശവാസികളില്‍ ചിലര്‍ എതിര്‍പ്പുമായി രംഗത്തെത്തി. ഇതോടെയാണ് നിര്‍മ്മാണം മുടങ്ങിയത്.

നിലവില്‍ കേരളത്തില്‍ മേയര്‍ക്ക് ഔദ്യോഗിക വസതി സ്വന്തമായുള്ളത് കോഴിക്കോട് കോര്‍പ്പറേഷനില്‍ മാത്രമാണ്. ഇതേ രീതിയില്‍ തന്നെ തലസ്ഥാനത്തും മേയര്‍ വസതി പണിയാനാണ് പാര്‍ട്ടിയുടെ തീരുമാനമെന്നാണ് വിവരം. ബാര്‍ട്ടണ്‍ഹില്ലിലെ നാട്ടുകാരെ വിശ്വാസത്തിലെടുത്ത് ഉടന്‍ മേയേഴ്സ് ഭവന്‍ നിര്‍മ്മാണം തുടങ്ങാനാണ് ഇപ്പോള്‍ പാര്‍ട്ടി തീരുമാനിച്ചിരിക്കുന്നതെന്ന് ചില മാധ്യമങ്ങള്‍ റിപ്പോര്‍ട്ട് ചെയ്യുന്നു.

ആര്യക്ക് സ്വന്തമായി വീടില്ലെന്നറിഞ്ഞപ്പോള്‍, എല്‍ഡിഎഫ് സര്‍ക്കാര്‍ ലൈഫില്‍ വീട് കൊടുത്തില്ലേ എന്ന് നിരവധി പേര്‍ ആര്യയെ പരിഹസിച്ചിരുന്നു. അവരോടെല്ലാം ആര്യ പറഞ്ഞത് ഇങ്ങനെയാണ്: ”രാഷ്ട്രീയത്തില്‍ വരുന്ന സമയത്ത് അല്ലെങ്കില്‍ ഇടതുപക്ഷ സ്ഥാനാര്‍ത്ഥിയായി നില്‍ക്കുന്ന സമയത്ത് ഒക്കെ വീടില്ല എന്നത് ഒരു പോരായ്മയായി കണ്ടിട്ടില്ല അല്ലെങ്കില്‍ ഒരു സഹതാപത്തിന് വേണ്ടി ഞാന്‍ ഒരിക്കലും പറഞ്ഞിട്ടില്ല .കാരണം നമ്മളെക്കാള്‍ പ്രയാസങ്ങള്‍ അനുഭവിക്കുന്നവരെ എനിക്കറിയാം. എന്നാല്‍ ഇത് വലിയ വാര്‍ത്തയായി നല്‍കിയ നവമാധ്യമങ്ങളും പോസ്റ്റുമൊക്കെ ഞാന്‍ കണ്ടതാണ്. അതിനപ്പുറത്ത് എനിക്ക് പറയാനുള്ളത് ഇത്രയും കാലത്തില്‍ അത് ഞാന്‍ ആരോടും പറഞ്ഞിട്ടില്ല. പ്രയാസങ്ങള്‍ ഉണ്ടായിരുന്നു. അതെന്റെ വ്യക്തിപരമായ കാര്യമാണ് അല്ലെങ്കില്‍ കുടുംബത്തിന്റെ കാര്യമാണത്. അങ്ങനെ വീട് കിട്ടിയിരുന്നെങ്കില്‍ തെറ്റായ ഒരു പ്രവണതയായി പോകും എന്നെ പറയാനുള്ളു. കാരണം രാഷ്ട്രീയപരമായി ഇടതുപക്ഷത്തില്‍ നില്‍ക്കുന്നവര്‍ക്ക് തന്നെ ഇടതുപക്ഷ സര്‍ക്കാര്‍ ഭരിക്കുമ്പോള്‍ വീട് നല്‍കാമെന്നൊന്നും സര്‍ക്കാര്‍ ആരോടും പറഞ്ഞിട്ടില്ല. നമ്മളെക്കാള്‍ സാധാരണക്കാര്‍ ആയിട്ടുള്ള ഒരു പക്ഷേ ഇതിനേക്കാള്‍ കഷ്ടത അനുഭവിക്കുന്ന ആളുകള്‍ക്കാണ് അത് കിട്ടേണ്ടത്. ഞാനും അച്ഛനും അതില്‍ തന്നെ ഉറച്ചു നില്‍ക്കുന്നു”.

Leave a Reply

Your email address will not be published. Required fields are marked *